'O SULDATO 'E GAETA

Comme stongo ccà dinto? E che ne saccio!

Nce sto pe ccarità, signore mio!

Miezo cecato... me manca nu vraccio...

Nun mporta! Tutto p''o vulere 'e Ddio!

Comme me chiammo? Michele Migliaccio

fu Giesummino e fu Carmela Pio.

Cinco campagne. Nativo di Meta.

Dicorato alla presa di Gaeta!

2.a

Mo.... so'pezzente dello Spizzio! Tanno,

tenevo a Meta na massariella.

Scampuliavo, ncapo e npede l' anno,

c''o ggranone, 'o purciello e 'a vaccarella.

Campàvamo na vita senza affanno,

ma, doppo muorte tata e 'a vicchiarella,

me sentette talmente abbandunato

ca pigliaie e me jette a fa'suldato...

3.a

Era l' epoca bona 'e 1’abbundanza

sott''o Burbone Che dicite?.... No?....

E ve ngannate 1'anema! Ogne panza,

senza 'a vacantaria ca nce sta mo!

O piso, jeva justo, cu 'a valanza!

Parola mia !.... Crediteme, signò,

ca si nun fosse stato 'o tradimente

io nun starria ccà dinto a fa 'o pezzente...

4.a

Comme dicite? Mo, a sittantott'anne,

vicino 'a fossa addò me chiamma 'a Morte,

io me ngannasse l' anema? Sti panne

ca porto ncuollo, so'vriogna forte!

'A sola e vera causa 'e tutt''e nganne,

de tutte 'e patimente, 'e tutt''e tuorte,

fuie 'o cuntegno 'e cierti tale e quale

ca nce chiammàino frate! 'E libberale!

5.a

'O bbedite? Redite n'ata vota!

E tuttuquante rideno, ccà dinto !....

Ma si 'a furtuna arriva a cagnà rota,

sa'quante faciarranno 'o musso astrinto?

Dio sulo, ncielo, n'ha pigliato nota,

de chello ch'è succiesso! E n'è cunvinto!

Stu vraccio c’aggio perzo, chisto ccà,

nun l’ha cercata mai, 'a carità!

6.a

Stu vraccio fui distrutto 'a na granata,

e l' aggio perzo p''o paese mio!

Francischiello, a Gaeta, 1'ha guardata

nfi'a dint'all'uocchie, 'a Morte, nnanz'a Dio!

L'avimmo canusciuta, 'a cannunata!

Ma doppo? 'O ttuio è chesto? E m''o ppigl' io!

L'avimmo dato 'o sango, 'a Patria bella,

e 'a Patria stenta a darce na panella!

7.a

Ch'è? Nun redite cchiù?.... Storia vivente,

io m'arricordo tutta 'a funzione!

Maria Sufia, 'o Rre, strille, lamiente,

'a famma, 'o tifo, 'e mbomme a battaglione,

'a forza 'e core 'e chilli reggimente,

'a lampa nnanz''a vocca d' 'o cannone,

case cadute, cchiesie sgarrupate,

e Francischiello nzieme cu 'e suldate!

8.a

Ch'era succiesso? S'era apierto 'o nfierno?

"Maistà, ccà nc'è pericolo!.... ,, - "Nun mporta!,,

Isso, 'a Riggina, 'e Principe, uno pierno!

E 'o pericolo sempe, arreto 'a porta!

Nun murive stasera? Era nu terno!

Senza rancio? E che fa! Fuma e supporta!

P''o buono esempio, manco 'o Rre, ha magnato...!

Tu si'napulitano e si'suldato!

9.a

Ch'è stu fracasso, pe ttramente viglie

Cu ll'uocchie 'e pazzo 'a reto 'a saittera?

Strille, suone 'e trummette, parapiglie

E scuppiata n'ata pulveriera !...

Correno, leste, cinco se'squatriglie:

"Tradimento, Maistà !...,, Propio chell'era!

N'ato fracasso ?.... Cade nu castiello

Ferite, muorte, 'ncèndie.... Nu maciello!

10.a

Chest'è Gaeta! Tuttuquante, tutte,

napulitane e svizzere, p''o Rre!

E mmiezo a nui na rètena 'e frabbutte

ca tradevano a Patria! E attocca a me

de cacciarve da 'e fatte sti custrutte,

pecchè Gaeta, mio signò, chest'è!

Resistenza p''o core d''e suldate,

tradimento d''e cchiù beneficate!

II.

11.a

Era 'o mese 'e Dicembre d''o Sissanta...

Faceva friddo peggio 'e na Siberia!

Io stevo arravugliato int''a na manta,

a 'e ttre d''a notte, (mannaggia 'a miseria!)

quanno me veco cammenà pe nnanta

n'ombra ca s'avvicina seria seria....

"Chi va là? ,,- "Bravo! Io veglio comm''a te!,,

Me venette nu triemmolo! Era 'o Rre!

12.a

Era o Rre nuosto! Francischiello nuosto,

ca mai s''e alluntanato 'a coppa 'e mmura!

Nce aveva fatto o callo e o core tuosto,

e nun sapeva che vo'di'paura!

Signò, sentite 'o servitore vuosto!

Nun ce vuleva, chella jettatura!

O chiammàvano scemo e Lasagnone,

ma annascunneva 'o core 'e nu lione!

13.a

E 'a Riggina! Signò !... Quant'era bella!

E che core teneva! E che maniere!

Mo na bona parola 'a sentinella,

mo na strignuta 'e mana a l'artigliere....

Steva sempe cu nui!... Muntava nsella

currenno e ncuraggianno, juorne e sere,

mo ccà, mo llà.... V''o ggiuro nnanz''e sante!

Nn'èramo nnammurate tuttuquante!

14.a

Cu chillo cappellino 'a cacciatora,

vui qua'Riggina! Chella era na Fata!

E t'era buonaùrio e t'era sora,

quanno cchiù scassiava 'a cannunata !....

Era capace 'e se fermà pe n'ora,

e dispenzava buglie 'e ciucculata

Ire ferito? E t'asciuttava 'a faccia....

Cadive muorto? Te teneva mbraccia....

15.a

'E ppalle le fiscavano pe nnanza,

ma che ssa’... le parevano cunfiette!

Teneva nu curaggio e na baldanza,

ca uno le zumpava 'o core 'a piette!

Te purtava 'e ferite all'ambulanza,

steva sempe presente a capo 'e liette...

E tutte, chi 'a chiammava e chi mureva,

'a stevano 'a guardà cu ll'uocchie 'e freva....

16.a

Murì p'Essa! Era 'o suonno 'e tuttuquante!

Desiderà nu vaso nfronte 'a chella,

segnifecava: " Mettimmoce nnante

pe fa na morte ca se chiamma bella!,,

Npietto, p'avè n’aucchiata a sta Rignante,

te facive arapì na furnacella !....

Propio accussì, signore mio !.... Vedite?....

V''o sto cuntanno e chiagno... e vui redite

17.a

No !... Nun me piglio collera !... Se sape !...

Vuie site troppo giovane....! Nun mporta !...

Ma, 'a tanno a mo !... se so'mbrugliate 'e ccape !...

V'hanno mparato a ghì p''a strata storta !...

'E piamuntise? Chille erano 'crape !...

Ma 1'avetteno nzuonno, 'a bona sciorta!

E a Calibbardo ca metteva 'e gghionte

ched'è? nun 'o sparàino, a Naspramonte?!

18.a

Gnorsì, songo nu povero pezzente!

So'nu povero viecchio rimbambito....

Me diceno ca nun capisco niente!

Me chiammano burbonico e patito....!

Ma chille v'hanno fatto 'o tradimente

quanno v' hanno ammentato 'o Prebbiscito !....

Chella è stata na ténta carmusina,

sta Libbertà vestuta 'a culumbrina!

19.a

Perciò, turnammo a nui, ch'è meglio assaie!

Avite che sentì! So'rose e sciure!

Ma 'a vera storia nun s'è scritta maie,

e so'pigliat'asse pe figure!

Vulesse scriver'io, tutte sti guaie!

V''e subbissasse, a sti repassature!

Che d'è?... p''a risa ve vene 'o selluzzo ?...

Ma 'a Verità cadette nfunn''o puzzo!

20.a

Sulo loro, hanno fatto 'e gguapparie!

Sultanto 'e libberale !... E basta ccà!

So'ghiute nnanze, v'hanno aperte 'e vvie !...

Gente 'e curaggio e generusità !...

Ma 'o Rre, 'a Riggina, 'ncopp''e battarie,

nisciuno mai l' ha viste arresecà?

Nisciuno ha ntiso, appriesso a Francischiello,

chella Marcia Riale 'e Paisiello? !...

III.

21.a

Già stevamo 'a nu mese resistenno,

e 'o primmo traditore jette bello!

Io, pe 1'arraggia, ancora sto chiagnenno!

Passai, arme 'e bagaglie, 'o culunnello!

Cialdino, lusinganno e prumettenno,

s'aveva cumbinato a Pianello!

E chist'amico, stu galantumone,

se cunzignai cu tutt''o battaglione!

22.a

Embè, dico accussì, chesto sta bene?

Quann'uno dà parola 'e fedeltà,

si tene tanto 'e sango, dint''e vvene,

p''o Rre, p''a Patria, s'ha da fa scannà!

Ma no! Se ne luvaie 'a dint''e ppene!

Avette 'e llire pe putè scialà,

e vutai fuoglio! Da che munno è munno,

chi nasce quatro nun po'muri tunno!

23.a

Crediteme, signò, ca chest'è 'a storia!

Pe quant'è certo 'o juorno d'ogge! È chesta!

'A tengo ribbazzata int''a memoria,

dint''o penziero fisso ca me resta!

Chello ca primma era cafe, è cecoria!

e se n'è fatta na mala menesta!

V'hanno ngannato! E 'o ditto dice buone:

Vieste Ceccone ca pare barone!

24.a

V'hanno vestuta 'a Verità sincera

comm'a na mascarella ferrarese!

Ma chella, 'a Storia overamente overa,

'a sanno tutt''e pprete d''o paese!

Ve 1'hanno scritta de n'ata manèra,

e Francischiello n'ha pavato 'e spese!

Nfamità, nfamità, signore mio !

Nfamità grosse, sott'all'uocchie 'e Dio!

25.a

Tre mise e miezo 'e patimente cane,

e a tridece 'e frevaro Sissantune

capitulammo nfra 'e sbattute 'e mane

d''e libberale fauze e scavuzune!

Belli fratielle! Belli crestiane!

Belli ppagnotte! Belli carugnune!

Vi'che vittoria! E che cuscienzia! E c'arte!

Quanta Napuliune Bonaparte!

26.a

Tutte, cu 'e piette nnanza, àute e ntufate,

salvaino 'a Patria, e 'a Libbertà venette.

'E cammurriste fuino accarezzate,

'e mariuncielle avetteno 'e cunfiette....

E nui, maletrattate e suspettate,

cu 'annore nfaccia e cu 'e fferite mpiette,

nui suppurtaimo, nfra delure e schiante,

'e malefiggie nire 'e tuttuquante!

27.a

Francischiello cadette! Abbandunaie

'o Regno e se mettette a viaggià!

Chi fui beneficato 'o ngiuriaie,

ma ll'uocchie le lucevano 'e buntà!

Era nu patre! Nun s'è visto maie

n'esempio meglio, 'e core e carità!

Perciò murette all'estero! E cu isso

è muorto n'ato Cristo crucefisso !

28.a

N'ato Cristo, gnorsì! Cu 'a spogna 'e fele,

'e vase fàuze, 'e spine, e tutt''o riesto!

Se credeva ca Tizio era fedele?

E chillo 'o mpapucchiava lestu lesto....

Vulevano a Vittoriamanuele

e perciò 'e nfame s''o spicciaino priesto....

Quanno nisciuno amico 'o succurreva,

Isso, sulo, a Gaeta, resisteva!

29.a

E resiste ogge, resiste dimane,

e resiste e resiste, finalmente,

comme vuò fa? Viscere 'e crestiane

nun sanno tullerà sventure e stiente!

Primma 'e nce fa trattà peggio d''e cane,

primma 'e nce fa muri mmiezo 'e turmiente,

isso dicette: " - No! Basta! Fernimmo!

Sarraggio Rre, ma ve so patre, apprimmo! ,,

30.a

Diciteme vuie mo: quanta rignante

penzano cu stu core e cu st'ammore?

Annummenatemmille tuttuquante,

e po'vedimmo chi ha tenuto core!

Ma che! Rignante vene a di'birbante,

quanno, vedenno ca 'o paese more,

1'ajuta a ben murì na vota e bona,

sultanto pe nun perdere 'a curona!.....

31.a

L'ha fatto, chesto, Francischiello ?... Maie!

Dicette: "Preferisco 'e ve salvà! ,,

'E ggenerale attuorno se chiammaie

e lle spiegai che lle restava a fa!

- "Voglio luvà 'e suldate 'a miez''e guaie

'E ttrattative voglio accummincià !....

Jate a cercà na tregua, ncopp''a botta!

Stàteme a sentì a me, luvammo 'a sotta ! ,,

32.a

E comme?! Accumminciammo 'e ttrattative,

e tu, Cialdine, nun suspienne 'o ffuoco?

Nce vulive adderitto atterrà vive,

ca te spassave a seguità stu juoco?!

'E ggranate, (pe sfreggio, pe currive,

pe nfamità? che ssaccio!?) mai nu poco

cessaino 'e smantellà sta chiazzaforte,

dinto Gaeta semmenanno a morte!

33.a

Ma che v'ha fatto, Dio, ca le lanzate,

tutte sti mbomme ncopp''a casa soia?!

'E spitale, stracarreche 'e malate,

so'state causa 'e pruvucà sta foia!?

'Nce avite assassenate e massacrate

a coppa e 'a sotta, cu nu core 'e boja,

e nun v'abbasta?! Jate ascianno 'o rieste,

quann'uno ha ditto cunzummatummeste?!

34.a

Tenite ancora sete 'e stragge? Ancora?!

E nun ve ne mettite ancora scuorno?!

Sempe granate e mbomme 'a dinto e 'a fora

da mezanotte a quanno schiara juorno?

Animale feruce d''a Mmalora!

E nce cannuniàino tuorno tuorno,

cu tutt'arraggia d''a vigliaccaria,

pe fà sapè a Cavurro 'a guapparia!

IV.

35.a

Che cchiù ve pozzo dicere ?... Che ssaccio?

L'urdemo juorno 'o tengo scritto 'ncore,

pecchè fui tanno ca perdette 'o vraccio!

Ma ciento vracce guadagnai d'annore !

Po'... nce passaino tutte pe setaccio!

Venette 'a Libbertà, caro signore !

Ne cacciai ritto nfatto 'o tempurale,

e... ascette 'o Sole custituzzionale!

36.a

E sceruppatevillo cu 'a salute!

O v''o vulite fa'ndurato e fritto?

Rispunnisteve sì! Ch'avite avute?

V''o vvulite annià ?... M'aggia sta zitto?

'E ttasse chi 1'aveva canusciute?

Facitelo pe Cristo beneditto!

Nun me facite jastemmà cchiù forte

tutt''o sango d''a razza e chi v'mmuorte !

37.a

Scusateme.... scusateme.... 'O bbedite ?....

Chest'è quanno te saglie 'o sango ncapa!

So'nu gnurante.... vuie perciò redite....

Ma là nce avette colpa pure 'o Papa!

Site, vicario 'e Cristo, o nun ce site?

E chillo generale Mezacapa?!

Manco ne sape niente! E d'Agustino?

E 'o Rre, a sti sierpe, s''e scarfava nzino!

38.a

Nu Nazzareno e ciento Scariote!

Nu core d'ommo e ciente core 'e cane !

E 1'avvisaino cientumilia vote

pure 'o Conte 'e Caserta e 'o Conte 'e Trane!

Niente! Nun ne vuleva piglià note!

Ma finalmente, po’, 'a tuccai cu 'e mmane,

'a Verità, redotta na petaccia,

quanno a Gaeta 1'avutaino 'a faccia!

39.a

Ll'articolo quattuordece, diceva,

dint''a Cummenzione, ca 'e suldate,

(ognuno 'e nui!) 'a casa se ne jeva

Cu tanto 'o juorno, struppie o mutilate.....

Chi prumetteva se cumprumetteva!

Ma tuttuquante fuimo abbandunate!

Nisciuno avette nu cuppino 'e pasta!!

Prumetteva Cialdino! E tanto basta!

40.a

Chisto Cialdino teneva nu core

ca nun ghieva, signò, manco tre calle!

Sapeva sulo fa 'o bummardatore

ncoppa Gaeta, cu granate e palle!

E se vedette, (m''o rricordo ancora!)

stu core suio, cu 'o fatto d'e cavalle!

Fatto succiesso, ma succiesso overo!

Fatto, ca, si se conta, nun se crere!

41.a

Dinto Gaeta se suffreva 'a famma,

e fernette 'o furaggio all'animale!

'O figlio sparpetava mpietto 'a mamma;

mancava l’uoglio, 'o vino, 'o ppane, 'o ssale....

Accumminciava a murmurà, 'a mazzamma,

buttizzata da quacche libberale,

e poche juorne doppo 'o Primmo 'e 1'anno

'o popolo se steva arrevutanno!

42.a

'E cavalle diune e affamate,

jevano comm'a pazze, 'a sotto e 'a coppa!

Apprimma già s'avevano magnate

'e saccune cu 'e sbreglie, 'e sseggie 'e stoppa..

Po'truvaimo carrette rusecate,

albere, porte, mure.... E a chioppa a chioppa

se sbranavano peggio d''e liune,

quanno nun muzzecavano 'e guagliune.

43.a

Passavano, 'e cavalle, comm''o viente!

Nun te devano 'o tiempo 'e chiammà ajuto !

Passanno, t'azzannàvano !... E che diente!

Ogne muorzo facea nu fuosso futo!

Mmaggenàteve vui, mo’, sti spaviente,

ogne mumento, ogn'ora, ogne minuto!

Tenive appena 'o tiempo 'e te fa 'a rassa.....

"Sarva! Sarva !.... 'E cavalle!,, E 'a chiorma passa...

44.a

Embè.... quanno dicettemo a Cialdine

Pigliateville, datele a magnà,

v''e rrialammo, so'animale fine,

ponno servì cchiù a vui ca dinto ccà;

sa'comme rispunnette stu Cialdine?

Rispunnette: Nun aggio che ne fa !.....

Stanno buone addò stanno! So'affamate?

Sbranateve nfra vui, l' une cu ll'ate !...

45.a

Sia beneditto Giesù Cristo 'ncroce!

Nce ha casticate a nui, chi sa pecchè!

Erano prete, e scamazzàino 'a noce,

pe fa 1'Italia e scamettà nu Rre!

E se sapeva! 'O franfellicco è doce,

e tu che vuò? ca t''a cunzegno a tte?!

Venette 'o tiempo, avetteno 'a furtuna,

e 'o franfellicco fui 1'Italia Una!

V.

46.a

Mo, d''e cumpagne miei, caro signore,

cierte so'muorte 'e famma, ma ciert'ate,

uno è cucchiere, n'auto scupatore,

n'ato vènne puntette 'e scurriate!

Io po’, ccà dinto, so'nu mperatore,

caro signore mio! Nce pazziate?

Loro stesse m''o ddiceno !... " Te lagne?

Ringrazzia a Dio, ca duorme, vive e magne !... ,,

47.a

Embè.... Gnorsi! Magnammo e po'vevimmo

nfi'a che nce sta lucigno a la lucerna!

Lassa fa a Dio, ca doppo nc''e vvedimmo,

sti ffacce noste! Dint''a vita eterna!

Sa'quanta belli smorfie nce facimmo?

Tanno, signò, voglio piglià 'a quaterna!

Quanto le dico justo doi parole!

Quanto 'e cchiammo fetiente e mariuole!

48.a

Mo'passo 'e juorne a ricurdarme 'e fatte

de chilli quatto mise maleditte,

e veco 'e mbomme ncopp''e ccasematte,

e sento 'e chiante 'e tanta ggente afflitte !....

Sa'quant''e lloro se so'fatte chiatte?

Che ne parlammo a fa? Stàmmoce zitte!

Ma, sempe ca m'avota 'o cereviello,

io me vaso 'a meraglia 'e Francischiello

49.a

'A tengo comm''a na relliquia santa,

pecchè me 1'aggio mmeretata overe!

'A porto ncopp''o core da 'o Sissanta!

So'cinquantasej'anne! E pare ajere!

P'essa darria sta vita tuttaquanta!

Sott''o cuscino 'a stipo tutt''e ssere,

e quanno murarraggio, dint''a fossa

l'hanno 'a fa sta! Vicino a sti qquatt'ossa!

50.a

Mo sta ccà, sott''a giubba.... Che dicite?

Pecchè me 1'annasconno ?... Embè.... signò!...

Nun me songo spiegato ? Nun capite ?...

Site giovene e strutto, mo nce vo’.....!

Io me l'aggio abbuscata p''e fferite,

p''o vraccio muzzo !.... È na relliquia o no?

E 'a putesse purtà, sta gloria mia,

ncopp''a livrera d''a Pezzentaria?

Dicembre 1917 Gennaio 1918